قصه سياسيه (مخ جناب العمده الجهنمى)

يشرفني طبعا انى افتتح منتداكم الجميل ده باول قصه وتكون ليه وهيه قصه( سياسيه شويه ) ربنا يجعل كلامنا خفيف عليهم هههههههههههههههههههه المهم القصه اسمها

حصاوي
رجل غلبان وابن بلد
وعشان يا ولداه
غلبان وعلي نياته
قرر يفهم
رغم ان الفهم في سلو بلدنا
خيانه عظمي
وجريمه لا تغتفر
راح لعم حسانين بتاع الجرايد
اشتري الجورنال
وقعد يقلب فيه
لقي خبر عاجل
"حضره العمده يفتتح مصنع جديد للطرابيش لخدمه اهل الكفر"
حصاوي بص للخبر وريل
قام واخد ديله في سنانه
وجري علي شيخ الغفر
ناول شيخ الغفر الجورنال
وقاله: الا قوللي يا شيخ الغفر
هو لسه فيه ناس بتلبس طرابيش؟!
شيخ الغفر ضربه علي قفاه
وقاله هتفهم اكتر م العمده يا وله؟
اما انك حصاوي بصحيح!
حصاوي قلبها في دماغه
قال يمكن هيوزع علي عيال الكفر طرابيش في العيد
او يمكن انا حمار
وفهمي علي ادي
حصاوي راح قعد ع القهوة
وطلب واحد شاي
عشان يوزن دماغه المتبرجله
بص للتليفزيون
لقي خبر عاجل
"فلوس المحصول وصلت للفلاحين
والكل منتشي وبيدعي لجناب العمده"
حصاوي طلع جيوبه بره
مالقيش فيها ولا جنس مليم احمر؟!
فبص للخبر وريل
قاه واخد ديله في سنانه
وجري علي حضرة الصول
وقاله: الا صحيح يا حضرة الصول
هو احنا صرفنا فلوس المحصول؟!
حضرة الصول ضربه علي قفاه
وقاله انت هتعدل علي كلام جناب العمده يا وله؟
اما انك حصاوي بصحيح!
حصاوي قلبها في دماغه
قال يمكن الدودة كلتهم
هو انا يعني هافتكر احسن من جناب العمده!
حصاوي روح البيت
مراته قامت تحضرله لقمه ياكلها
ابنه جري عليه
وقاله تصدق يابه
قريت ان عزبتنا بتصدر تفاح امريكاني
حصاوي استغرب
وقاله قريتها فين دي يا وله؟
قاله قريتها في كتاب المدرسه
حصاوي بص لابنه وريل
قال لازم اروح لسيدنا الشيخ
هو اللي هيفطمني ع اللي فيها
وخد ديله في سنانه
وجري علي سيدنا الشيخ
وقاله: الا صحيح يا سيدنا الشيخ
هيا عزبتنا اللي مش لاقيه العيش الحاف
بتصدر تفاح امريكاني للعزب المجاورة!
سيدنا الشيخ بصله باستغراب
وقاله مين اللي قالك كده يا حصاوي يا ابني؟
حصاوي اطمن انه بخير ومش مسطول
قاله الوله ابني قراها في كتاب المدرسه
سيدنا الشيخ ضربه علي قفاه
وقاله حد يكدب شهاده جناب العمده يا وله؟!
اما انك حصاوي بصحيح!
وضربه علي قفاه تاني
حصاوي قاله حتي انت كمان يا سيدنا الشيخ
سيدناالشيخ قاله:
ما انا لو سألت

كان زماني مضروب علي قفايا زيك كده
يا حصاوي!


وشكرا ليكم كلكم

بجد بحييك جداً جداً جداً جداً و أنت فعلاً أمتعتني بهذه القصه الجميله
و الله لجد عجبانب موت موت