بحب بت
مدوخانى
مجننانى
يوماتى بأسرح فيها
وأكتب فى الأغانى
أشعر قصايد
وأقول ياليل
جمال حبيبتى
خمرة وسكرنى
بأشرب..ولما
أشرب تقول
تانى وكمانى!!
بحب بت
مدوخانى
مجننانى
طب أعمل ايه؟
إديت حنانى
وإديت آمانى
وإديتها مالى
وإديتها حالى
وإديت سنينى
وإديتها عينى
وعايزه تانى!
تانى وكمانى..
آآآه
آه من فلانه
بنت الفلانى!
تعمل دا كله
وتشيل وتهبد
فى جيفارا بيه
شملول زمانه
وتحب واد
من صنف تانى؟!
آآآآه
آه من فلانه
بنت الفلانى
من يومى
حاطانى فى جيبها
وعارف إنى
مقهور وراضى
وإن الجناة
ملهومش قاضى
وإكمنى قارى
التاريخ كويس
بأمد فى الخطوة
وأداوى
مستنى ينفخ يوم
فى صورتى
وأعيد زمانها
وأعيد زمانى
آآآآه
أه من فلانة
بنت الفلانة
تقولى شوف ..
فلان عاكسنى
أجرى وأقطع
هدومى... يانى
وبعد منها
تجرى تصالحه....
وتخاف عليه.....
لو حتى منى
وأنا اللى أبقى
فى الوش جانى
آآآه
آه من فلانه
بنت الفلانى!
بحب بت
مدوخانى مجننانى
بحب بت
مدوخانى
مجننانى
بأبوس تراب
رجليها... وأركع
تقولى تانى..
إركع وبوس
و إملا القنانى...
آآآه
آه يانى منها..
ومنها يانى..